ANCORA
WALTER BASSO:
"Ausiliari del
trafico"?... andè a...
Dopo
votassion: desso sì che stemo ben
E
basta co tuto sto balon in television
Erbivoro? No
grassie!
Figari e cuafer
I cicristi domenicali
Intervista a Walter
Basso
L'era
dei maleducati e dei selvadeghi
Le
banche a ramengo suo
Le me prevision par
el 2009
Le partense
inteligenti
Notissie una più
inbessile de st’altra
Numari
verdi e resie
Parenti
serpenti... gran verità
Pubricità ala
bojona!
|
Caricatura de Walter Basso fata dal’amigo Valentino
Villanova
|
Onbre rosse
& OMENI ONBRA
“Ombre rosse” ze el titolo de un famoso film de cau boi mericani ma qua da noialtri in Veneto ze calcossa de più: ze la definission de un bere tipico ma ze anca un soranome miga tanto sinpatico col quale se ciama l’amigo o el conossente che come hoby primario ga la frequentassion costante dele ostarìe dela zona co relativo ritorno casa a ore indecenti percorendo la strada stile “bisato” (co qualunque mezo sia: a partire dai piè, passando par la bicicleta e finendo co la màchina)… Comunque el termine “onbre rosse” ze generico parché ciapa dentro anca le onbre bianche e quele rosate sensa distinssion alcuna. Basta che uno supera i sie-sete goti al dì del famosissimo “netare dei dei”, dito volgarmente vin ,de qualsivoglia colorassion (serti beve de tuto ciavàndose del colore par via che i ze daltonici) par guadagnarse sul canpo el sudeto titolo onorifico che poe anca èssare sostituio dal altretanto inportante “Omo Onbra” che no’l ze assolutamente el supereroe merican… A proposito de mericani come mai no i ze boni catare Bin Laden o vìnsare na guera in pochi dì, avendo zente come Supermen, Barbastrejo Men, l’Omo Ragno, l’Omo Infogonà, L’incredibile Ulc talmente grosso che se el mola na scoresa inte na fabrica de scuriandoli fa carnevale par sie mesi, Rambo e Rochi???... Mah, no se sa! Tornando al nostro amato figuro ciamà “onbre rosse” e che normalmente se cata nele categorie dei agricoli, murari, pensionati e nulafacenti, bisogna dire che el mantenimento de sto hoby conporta nel tenpo grandi sacrifici: spapolamento del figà co svilupo de inponente “cirosi sinpatica”, naso paonasso che pare na cartina giografica dove i capilari viola podarìa rapresentare i fiumi, insulti e bastonà dala mojere inferocita quando al ritorno casa el sogeto vómega sul tapeo persian (par questo se sugerisse de note de dedicarse ale “onbre bianche”: infati vuto métare quanto mèjo che ze trare fora intel tapeo vin bianco invesse del vin nero?... El bianco sul tapeo se nota tanto manco!), ma in genere “l’Omo Onbra” ze costante, puntilioso e no torna indrìo dal so inpegno gnanca se te lo copi. Oltre ala mojere altro naturale e mortale nemico ze el mèdego dela mutua che, no se sa parcossa, odia a morte le onbre in genere. Questo serca de terorisare el nostro sogeto co discorsi su malatie tipo inbecilità cronica, cirosi sinpatica, epatite dala A ala Z, lebra, virus del’ebola, peste nera bubonica, catarate al figà, tonsillite, broncopalmolive, mal dela limega (inpotensia generandi), ernia ombelicale e testicolare, infruensa suina, peronospora, aidiesse, biciesse e pezo ancora de casse da morto in atesa, morte prematura tra dolori atroci. No bisogna assolutamente darghe reta senò se ciapa paura e la paura ze cativa consiliera… De conseguensa se taca bere “aqua la quale marsisse i pali e fa vegnere i òmeni zali”. Insoma el mèdego, sto àseno, voe far crédare che el vin ze un nemico. Mi no ze che vojo savérghene più del dotore che ga studià come un musso e quindi afermo perentoriamente: poe anca èssare che el vin sia un nemico ma ricordeve sempre che chi scanpa davanti al nemico ze un viliaco. E se merita dispresso sempiterno. Ragion par cui vago bévarme na onbra ala vostra salute!
Ps. Me desmentegavo de dirve cossa ga dito na volta me nono che gera filosofo lapalissiano al médego che ghe aveva sugerìo de bere manco par védare se el stava mèjo: - No podaria invesse, sior médego, bévare de più par védare se stago pezo? -... Che omo zente, altro che me mojere!!!
Walter Basso
LA CASA EDITRICE PER AIUTARTI A PUBBLICARE IL TUO LIBRO…
PER ORGANIZZARTI UNO SPETTACOLO….
PER FARTI SORRIDERE CON LE SUE PUBBLICAZIONI…
Ed. Scantabauchi srl Via Straelle di Rustega, 29
35012 Camposampiero PD - fax 049.5794781
Email: info@edizioniscantabauchi.it
cell. 335.8315665 Walter
www.edizioniscantabauchi.it
|