ANCORA WALTER BASSO:
"Ausiliari del trafico"?... andè a...
Dopo votassion: desso sì che stemo ben
E basta co tuto sto balon in television
Erbivoro? No grassie!
Figari e cuafer
Intervista a Walter Basso
Le banche a ramengo suo
Le me prevision par el 2009
Parenti serpenti... gran verità
Pubricità ala bojona!
|
Walter Basso con Moreno Morello
|
L’ARTICOLETO AL CREN
LE PARTENSE INTELIGENTI
Sarà trent’ani che ogni ano dala primavera fin tuto setenbre i cosideti media taca bombardarne par tenpo consiliandone de organissarse par le ferie e de fare le famosissime “partense inteligenti” overo partire “scaglionati” onde rivare ale località turistiche freschi cofà rose, co le mojere soridenti a trentadò denti e i putini che dorme serenamente in màchina cofà angioleti… Ripeto, sarà trent’ani che mi scolto sti sagi consili e parto “scaglionato” magari de luni ale tre de matina, coi ciari stuai, sercando de fare in modo che nessun me segua e ze trent’ani che dopo pochi chilometri me cato incolonà co un paro de milioni de altri èssari inteligenti come mi partìi a note fonda pieni de bele speranse. Cossa significa tuto ciò?: significa chel popolo ze deventà inteligente tuto insieme e che quindi parte inteligentemente invesse che de sabo de matina ale oto, de luni de note ale tre col risultato che se ze convinti de partire “scaglionati” ma ormai se ga l’unica certessa de rivare “scoglionati”. La coa par andare in ferie ze la roba più teribile che possa tocare a un onesto marìo e pare de fameja: par i primi minuti se serca de mantegnare la calma e se soporta stoicamente anca la domanda del solito putin mona che taca fifotare: “Popà quanto manca al mare?” (se ze partìi da casa da un quarto d’ora e manca solo tresento chilometri!), se stà siti anca quando la mojere taca brontolare su: “Te lo gavevo dito mi de partire na ora prima….Ma ti gnente!”… Ma quando el sole taca bàtare sula capota, te toca stuare el condissionamento parché ala mojere ghe vien el brontolamento de buee, i toseti taca dire che i ga “Fame, sen, caldo, ghe scanpa de pissare, de fare caca, ghe vien da vomegare”, alora salta fora la bestia disumana che te ghè senpre tegnu sconto drento e te taci a insulti, biasteme, porchi e resie… Tuti quei che te ghe davanti, dadrio e in parte no ze più otomobilisti che un destin averso te ga messo vissin, ma deventa dei infami nemissi: sassini, figure porche da controlare e da punire in caso de sgaro. Guai a dio che un paraurti te toca, che uno te daga na ociada par storto, o che el bocia te diga: “Popà che l’omo là me ride drio!”… Su sti casi se verse le portiere dela màchina, se salta fora, se va ciapare par le strasse el desgrassià de turno e se taca a s-ciafoni, peadoni e paponi. Giustissia par tuti. Comunque dopo sie ore la coa se sfalda e finalmente se taca móvarse pur col terore de incapare in qualche autovelox, co senpre nele rece la dimanda del putin “Popà quanto manca al mare?” e la mojere che brontola somessamente contro el tenpo che ze drio inuvolirse… Come dio voe se riva a sirca venti trenta chilometri dala località sielta e qua sucede el patatrac: se ricata la coa che però stavolta no ze formà da do tre milioni de persone drento, sirca, mèzo milion de màchine, ma bensì de diese milioni de persone parché qua da da averse radunà tuta la zente che ghe gera al funerale de Maicol Gecson, forse parché sensa che ti te sapia gnente ze in ato el funerale del chitarista buson de Raulo Casatei… Inoltre ze tornà fora el sole e la mojere taroca pasrché “rivemo tardi e noi catemo più onbreloni e cussì i boce se scota e bla bla bla…” Eco. Se riva in albergo ale sie de sera, completamente destruti, se scarica le valise (la mojere ga portà via mesa casa… par i vestiti se metevi le rode al’armaron fasevi prima!), fasì na docia e andà zo giusto par sentire in television che i dise: “Viste le longhe coe registrate oncò verso le più note località turistiche, si consiliano le “partense intelligenti”. Partite i ordine alfabetico: par esempio dal’A al D a luni dal E al F al marti ecc.”.. Mi gavarìa un consilio mejo: oblighemo a stare casa dale ferie i béchi e le mignote… Secondo mi se sgonbraria definitivamente le strade!!!! Eco. Se riva in albergo ale sie de sera, completamente destruti, se scarica le valise (la mojere ga portà via mesa casa… par i vestiti se metevi le rode al’armaron fasevi prima!), fasì na docia e andà zo giusto par sentire in television che i dise: “Viste le longhe coe registrate oncò verso le più note località turistiche, si consiliano le “partense intelligenti”. Partite i ordine alfabetico: par esempio dal’A al D a luni dal E al F al marti ecc.”.. Mi gavarìa un consilio mejo: oblighemo a stare casa dale ferie i béchi e le mignote… Secondo mi se sgonbraria definitivamente le strade!!!!
a cura de Walter Basso
www.edizioniscantabauchi.it
|