ANCORA WALTER BASSO:
"Ausiliari del trafico"?... andè a...
E basta co tuto sto balon in television
Erbivoro? No grassie!
Figari e cuafer
Intervista a Walter Basso
Le banche a ramengo suo
Le me prevision par el 2009
Parenti serpenti... gran verità
Pubricità ala bojona!
|
Foto de s-ciapo: Morena, Mauro, Moreno Morello, Mara e Walter (l’unico co un nome un fià originale!)
|
L’ARTICOLETO AL CREN
DOPO VOTASSION: DESSO SI’ CHE STEMO BEN!!!
Mi sò uno onesto, quasi onestissimo, par no dire mona. Quindi ve preciso subito che sto articoleto lo gò scrito el 5 giugno scorso… “Cossa vuol dire ciò?” dimandarà el solito letore precisin. Gnente; solo che lo gò scrito prima de andare a votare e quindi no podevo assolutamente savere chi gavarìa vinto né ale comunali, né ale provinciali e manco ancora ale “europee” che ga da essere dele isole distantissime da casa mia. “E alora?” nova domanda del solito letore precisin. E alora se te tasi, can bestia, vago vanti e me dispiego!!! Vojo dire che anca se no sò chi gabia vinto mi sò dirve parfetamente come andrà le robe in Italia el dì che voialtri ciaparì in man sto bel gionaleto e lesarì sto articolo: overo in sto preciso momento. Questo parché mi gò seguìo tuta la canpagna leletorale (fasendome do balote cofà do mongolfiere!) e gò sentio tute le promesse fate al popolo bestia e infame (che saressimo noialtri).
Alora tachemo: no ghe ze più la crisi che i novi eleti ga subito proveduo a eliminare. Ze aumentà le pension dei vecioti de almanco mile euri al mese e calà quele dei ministri. No ghe ze più gnanca un disocupà: tuti lavora e ciapa stipendi stratosferici. Ze calà el numero dei ministri. Ze sparii i privilegi che sta casta gaveva. Tuti i stracomunitari disonesti e sensa permesso ze stà spedìì casa a calci in culo. In bassa Italia i ga asfaltà tuto el mare e cussì i gomoni no poe più galejare e rivare qua. La delinquensa ze sparia tuta. La mafia anientà. Nessun violenta più le done e i tosi al sabo de sera no fa incidenti. El goerno ga cavà oltre l’Ici l’Irpef. L’Ilor, L’Iva e Ivadarviaiciap. Le veline farà le veline e basta. Overo le arne mute. Sbassà le assicurassion auto, cavà via i boli dele machine, gnente più multe selvage. I ministri laora giorno e note suando cofà mussi albanesi, nessun assume più i parenti, i concorsi pubrici ze parfeti e regolari, le tangenti no esiste più e el debito pubrico ze azerà!!!... I statali no ze più fanuloni ma stacanovisti che par stacarli dal posto de lavoro ghe voe el mitra e i polissioti no ze più pansoni ma tuti come Ranbo 1… In ospedale parfin i te cura le malatie sensa coparte, no esiste più el tiche e le medessine i te le tira drio… Nessun più siopara, in passa se va solo par fare s-ciapo e cantare la Gigiona, Bepe Grilo ze deventà sordomuto e i contrati dei metalmeccanici vien rinovai oto di prima che i scada. Le vecete che ga in casa un cagneto gavarà un ministro a disposission do volte a settimana che ghe menarà el can a pissare, in più ogni tanto el sudeto ministro darà na tronbadina ale vecete tanto par tegnerle in esercissio..
Vero che oncò sucede tuto questo???....No???... Come no??? Me disì che ze tuto come prima se non pèso??? Ma no posso crédarghe!!!.. E tute chee bele robe che i ne gaveva promesso?..... Le gera tute busie???
Alora gaveva razon me nono Asdrubale quando me diceva: “Ricordate caro neodo che no ze assolutamente vero che tuti i politici ze busiari: ze però vero che tuti i busiari prima o dopo se buta in politica!”… Ze mejo che par tirarme su vaga snasarme chea bea righeta de polvareta bianca che me neodo Toma me da ogni sera come vitamina C… El dise anca che la me fa scrìvare dei bei articoleti!
a cura de Walter Basso
www.edizioniscantabauchi.it
|