ANCORA WALTER BASSO:
"Ausiliari del trafico"?... andè a...
E basta co tuto sto balon in television
Erbivoro? No grassie!
Figari e cuafer
Intervista a Walter Basso
Le banche a ramengo suo
Le me prevision par el 2009
Parenti serpenti... gran verità
Pubricità ala bojona!
|
Moreno Morello e Walter Basso nei pani di un angelo celeste a Verona
|
L’ARTICOLETO AL CREN
FIGARI & CUAFER
Stanote finché invesse de dormire cogitavo produsendo nove idee a nastro me ze vegnù inamente come col passare dei ani serte profession sia stà esageratamente nobilitae. Intendo dire che na volta fare un serto lavoro gera solo na necessità e el popolasso considerava serti professionisti semplicemente dei agricoli come lori mentre desso i stessi professionisti ze considerà adiritura ecessionali artisti… Parlo dei “barbieri”, na volta diti volgarmente anca “figari” o “tosacani” e desso invesse diti pomposamente “cuafer” (che no vol dire “fare il ghei” anca se serti efetivamente)… Na volta i “figari” laorava drento na stansa dita “botega” desso i “cuafer” laora nel cosideto “salone bisex” (che no vol dire “sala granda” ma posto de gran prestigio par òmeni e fémene). Na volta el tenpo lìbaro i “barbieri” i lo passava in stala a mónzare le vache, curare la stala, e spandare el loame, desso i “cuafer” lo passa fasendo miting, sinposi, concorsi artistici di tallio, andando a scatijare le sgrendene ai cantanti a Sanremo e altre manifestassion dove l’arte ze de casa… E i atressi de lavoro?: na volta bastava na forfe, un fon, na machineta come quela par tosare le piègore, na scuela (par el famoso tajo “stile frate” el te posava la scuela in testa e po’ co la machineta tajava tuto torno) un pètene, un penelo da barba, un rasuro, un cain par lavarte la suca,un toco de saon, un spassolon par spassolarte i peli da dosso e un camisoto da métarte torno. Desso l’atressatura ze tuta n’altra roba: el “cuafer” prima te controla un cavejo intel miscroescopio, po’ passa i dati sul compiuter (par savere se el ze grasso, magro, s’el sta ben o se ga la peronospora) e po’ in base ai risultati selie la duressa del’aqua (?), el sanpo (el ghe ne ga 1132 modeli), la frission, la crema balsamo al miele de cacia o gazia, ciama el garzon che te posta su na carega che pare ciavà dal Sattle dea Nasa, te lava, te suga, po’ te senta su n’altra carega che pare ciavà dal’abitacolo dea Ferari e ciama el “cuafer” che taca girarte torno, insieme al ferista che ghe passa i atressi (forfe de varie misure, fon aerodinamici che fa un vento dea madona, peteni, petenini e petenoni, machinete leletriche, bonbolete, butiliete, butilioni), come un can da usma e par tajarte la peociara ghe mete do ore bone parché ogni colpo de forfe ze studià e soferto cofà ogni penelada de Lionardo co ga piturà la Joconda. Ogni tanto se ferma, se slontana un paro de metri, e te studia come te fussi un petoloto de can randajo po’ ritaca spenotarte. Col ga finìo el te smalteca la suca co un gel speciale fato aposta solo par ti, te dà in omagio n’altre do sforbiciade a casso de can, te ruma drento e rece e el naso par sfoltirte le foreste che ze nate da sole, e te regala grandi consili par conservare al mèjo quei quatro pei che te ghè in testa e te ciava minimo 70 euroni… Eco parché rinpianso el me vecio barbiero che me brocolava in diese minuti, me toeva pochi schei, me informava su tuti i fati del paese e in più me regalava ogni fine ano un stupendo calendarieto prafumà incalcà de done nude che tanto ben ga fato par la me sana atività sessuale!!! E che i “cuafer” de desso vada tuti indove penso mi lori e i so saloni bisess!!!.. Desmentegavo: ricordate che manco chel “cuafer” te stà dadrio mèjo ze!
a cura de Walter Basso
www.edizioniscantabauchi.it
|