ANCORA WALTER BASSO:
"Ausiliari del trafico"?... andè a...
E basta co tuto sto balon in television
Erbivoro? No grassie!
Figari e cuafer
Intervista a Walter Basso
Le banche a ramengo suo
Le me prevision par el 2009
Parenti serpenti... gran verità
Pubricità ala bojona!
|
Raquanti personagi del staf de Moreno Morello in viajo par l’Europa: a sinistra Stefano l’astuto operatore, darente ghe so mi, giusto dadrio de mi Moreno in fase de coma vigile (par via del sono) e co l’espression gaudente Andrea, altro sagace operatore dito Spilberg!!!
|
L’ARTICOLETO AL CREN
PARENTI SARPENTI… GRAN VERITA’
Sto mese gò deciso de scrivare un articoleto social-educativo ma che farà porchesare tanta zente. Parlarò gnentepopodemanco del famoso “Parente streto consulente pissicologico a distanta del’ansian”.. Cossa vol dire sta roba? gnente paura se trata solo de un personagio che tantissimi conossemo. Tratasi del parente streto (fradeo o sorea) che sa tuto su come se trata l’ansian che vive in casa co ti. Comenta, critica, crea casini, vol savere quanto te tiri de pension, come te la usi e te insegna parfetamente come te ghe da fare col vecioto che da ani divide la to vita. Pecà che el so intervento sia senpre e solo a distansa in quanto normalmente el abita a na distansa inconcepibile: al massimo a 30 – 40 km da casa tua. El vegnarìa volentieri a darte na man se no fusse che tuti sti km corisponde par lu quasi a un viagio su Marte: porocan, nol ze abituà ai viaji longhi! E alora eco i alibi senpre pronti: se el ze un omo gavarà tre ernie del disco, do chili de maroidi, influense a nastro e lavoro massacrante. Se la ze na dona la gavarà un ocio fortemente danegià da un brusco avuo in età infantile che ga lassà traumi gnanca da contare, giramenti de testa continui, mestruassion dolorosissime, schina a tochi. Quindi le visite sarà rarissime e quasi tute colegae al pranzo luculiano o sena pantagruelica che ti te ofrirè, ma de portarse casa l’ansian qualche dì, par parmetarte de respirare, no se ghe ne parla asolutamente parché i problemi familiari (dovui ala presensa in casa de diverse bestie: el coniuge, na putina o un putin de ventitre ani, tre cani spussolenti e un paro de gatassi rognosi) ze pesantissimi e no parmete tregue… Però co ze ora de métarghe la pessa e farte fare barufe col vegliardo che te rancuri meténdoghe tuto l’inpegno possibile da na vita, sto càncaro, o càncara (che dio lo folgora), el ze senpre in prima linea. Apena ti po’ te te acorzarè che soportare tuto questo ze sintomo de macachite e te decidi, co tanto tato e educassion, de dirghe che el te ga roto anpiamente le balote e che te ghe auguri el s-copio fragoroso del figà o un screcarterie fulminante e te sugerissi l’insana idea (visto che sa tuto) de portarse casa pensionato, pension e libreto de banca, el parente-streto-che sa, se ofendarà mortalmente e sparirà al’orisonte cofà un can da lièvori. Continuerà comunque a dispensare via cavo sagi consigli al’ansian (che lo amarà teneremente parché ze più bon de ti che, standoghe insieme ventiquatro ore al dì, talvolta te ghe spachi le bale). In giro contarà che te sì un vampiro ingordo de pension e aconpanatorie, un farabuto, delinquente e via de longo. No te lo vedarè più par ani e ani par ricatartelo darente in cesa, al funerale del poro vecioto, co espression aflita e intensa de chi ze drio provare un dolore atroce (vergogna no parché el ga la cossiensa neta, visto che no la ga mai doparà). Se farà vivo anca, senpre pien de dolore atroce, co sarà ora de lèzare el testamento, parché se ghe ze da spartire calcosseta mai sia deto che lu no’l ghe sia. Sarìa un grave torto par el caro estinto… Come fasso savere tute ste robe?, poe dimandare l’inteligente letore: prova indovinare!!!.. Però poiché no sò del tuto mona zonto sta postila: “Ogni riferimenti a robe, persone, fati ze puramente casuale!”… Scrivo queo che vojo e nessun poe oféndarse… e se el se ofende vol dire chel se riconosse e mi godo!!!
a cura de Walter Basso
www.edizioniscantabauchi.it
|