ANCORA WALTER BASSO:
"Ausiliari del trafico"?... andè a...
E basta co tuto sto balon in television
Erbivoro? No grassie!
Figari e cuafer
Intervista a Walter Basso
Le banche a ramengo suo
Le me prevision par el 2009
Parenti serpenti... gran verità
Pubricità ala bojona!
|
LE BANCHE A RAMENGO SUO!
Ma varda che rassa de mestiero! Fin poco tenpo fa jera de moda no aver in scarsela gnanca un scheo ma èssare fodrai de brocheti dei assegni, bancomate, carte de credito (ma ti ghe credito ale carte de credito?), travel ciec e via de longo co tuti st’altri sacramenti che le banche distribuiva co alegria come se i fusse drio samenare formenton!... In television ghe gera uno in spiaja, in mèso al sabion che co un bacheteo faceva un sercio torno sé stesso medesimo e vardàndote co l’ocio amorevole te sussurava che la so banca jera tuta torno de ti!!!!... N’altro spot te mostrava la zente che andava a depositare su na banca che probabilmente jera anca na discoteca parché el popolo de mone che andava drento saltava a balava co goduria estrema. Par no parlare de quela che te verzeva un conto colorato (fa più alegria) e in omagio, se no gò capio male, te dava na suca de circa venti chili de peso. Infin ghe gera uno che diceva che la so banca gera difarensa (o diversa). Probabilmente el publicisava na banca par i ghei. E cussì tuto el popolo (conpreso e sotoscrito) andava in banca alegramente, se inpienava le scarsele de caramele gentilmente oferte, e gaveva l’inpression de èssare lu a inchiapetare el severo istituto de credito. E pensare che sarìa bastà riflètare un àtimo su un paro de robe par capire chi ze che lo ciapava in fioco: intanto le banche no ga assolutamente fiducia sui so clienti. La prova vien dal fato che i ne considera tuti ladri. Infati no se spiega come mai ai sporteli le pene par scrìvare sia tute ligae con la caenela!... Dopo cossa sucede co te domandi un mutuo?... Par dàrtelo i vole le garanzie.
Overo i voleva savere quante case te ghè, de quanti tereni te sì paron ecc. ecc. Scusa, ma se mi gavesse case e tereni miga me servaria i so schei... o no???... Ma desso, dopo che raquante banche ze andae a ramengo suo, la zente taca aver paura e i gira al largo più che i poe. Le vendite dei stramassi ze andà ale stele e l’unico a fregarse le man ze Mastrota che se la roba continua cussì el diventa più sior de Bil Gheit… Dai tacoini taca sparire bancomate e brocheti dei assegni e torna i euri, carta strassa, ma che dà più sicuressa. Inoltre le scarsele se sgionfa de feralia varia par le spese più picole. E i pensionati? Lori ze sereni e tranquili. Ze ani che dele banche lori se fa bao primo parché schei i ghe na ga pochissimi e secondo parché chei pochi che i ga da senpre giace soto ai stramassi. E chi se ne ciava del’inflassion, del caro vita, o che vegna vanti la recession?... L’inportante ze che no vegna vanti le moreje… altro che bae!
IN ARIVO EL CALENDARIO UMORISTICO VENETO 2009 FIRMA’ DA WALTER BASSO!!!
Otimo par le aziende come gadget da regalare a fine ano! (personalizzabile in ogni pagina)
Oroscopi beli par tuti - Come difendarse dai ronpibalote – L’unimo calendario al mondo che te dà tre giorni de festa in omagio – Consili par sopravivare l’ultima settimana del mese!
Presto inte le edicole opure contatando l’Ed. Scantabauchi srl al fax 049.5794781 – email info@edizioniscantabauchi.it o al celulare 335.8315665
|