ANCORA WALTER BASSO:
"Ausiliari del trafico"?... andè a...
E basta co tuto sto balon in television
Erbivoro? No grassie!
Figari e cuafer
Intervista a Walter Basso
Le banche a ramengo suo
Le me prevision par el 2009
Parenti serpenti... gran verità
Pubricità ala bojona!
|
E BASTA CO TUTO STO BALON IN TELEVISION!
Ormai no ghe ne posso più!!!... No sò se sipia parché l’unico sprò che mi che fasevo fin poco tenpo fa gera quelo che de andare al funerale dei me amissi che faceva sprò. Digo fasevo, parché apena gò capìo che no valeva la pena de andare ai so funerali parché lori sicuramente no sarìa vegnù al mio, o se sipia proprio par na forma de rigeto del zugo del calcio, ma veramente ghe ne gò i baloni (personali) pieni de sta montagna de programi televisivi indove de parla a proposito e a sproposito de tuti sti “canpioni” che core drio a na bala de curame un paro de ore scarse ala setimana e vien tratai come se i fusse del premi Nobel!... Giuro che se podesse mandarìa a laorare sui canpi de saturco i cosideti “giornalisti sportivi televisivi” primi fra tuti la mumia vivente de Biscardi dito “Polentina Zala” par via del paruchin chel ga posà sula sucatona, (ma dito anca “El serial chiler dea lengua italiana”), po’ Maurissio Mosca, ormai vecio come el cuco, che continua a sigare e spuare dosso al vero dela me television disendo senpre le stesse robe… E molèghela, par dio, co tuti sti processi del luni, i apeli del marti, le cassassion del mercore e cagade varie… E molèghela anca co tua chea zente in studio e fora studio che siga tuta insieme, che se intavana, se dise su de tuto che pare de èssare drio vardare na seduta de Montecitorio!!! El belo ze che a sta zente se stà messa a disposission na tennologia de avanguardia: robe come le “moviole” indove i te fa védare sentossinquanta volte de seguito el sacro garìtolo de Toti fin chel vien sfiorà dala scarpassa de Vieri, parché senò el popolo italian no dorme de note se no sa el sudeto sacro garìtolo ze stà macà opure no e se el falo gera rigore o punission de prima! A sto punto me vien da fare na riflession par farve capire come ze canbià i tenpi: na volta al Colosseo (inpianto sportivo primordiale) in canpo (se fa par dire) ghe gera un pochi de pori cani che se copava tra de lori par el dileto de mejari de siorati che stava tranquilamente sentà sui spalti e se divertìa da mati, desso in canpo che ze ventido siorati in mutande che core tranquilamente de baucon de qua e de là drio a un balon par trarlo drento na rede, davanti a mejari de pori cani che se bate e copa tra de lori!... E intanto fin che Mosca, Biscardi e un smerdaro de altri personagi (conprese le femene-subret che de sicuro se ne intende sia de “falli” che de bale visto che le ghe ne para do ogni sera!) discute de peadoni e rigori l’Italia va a catafasso, i pensionati, grassie ale lussuose pension invesse de fare atività motoria i fa atività mortoria, i zóvani ze disocupai e un malà al dì more grassie ala “malsanità”!... Ma chi se ciava: basta che in tivù i ne trasmeta el calcio e de tuto el resto se ne sbatemo i cocò!!!
IN ARIVO EL CALENDARIO UMORISTICO VENETO 2009 FIRMA’ DA WALTER BASSO!!! Otimo par le aziende come gadget da regalare a fine ano! (personalizzabile in ogni pagina) Oroscopi beli par tuti - Come difendarse dai ronpibalote – L’unimo calendario al mondo che te dà tre giorni de festa in omagio – Consili par sopravivare l’ultima settimana del mese! Presto inte le edicole opure contatando l’Ed. Scantabauchi srl al fax 049.5794781 – email info@edizioniscantabauchi.it o al celulare 335.8315665
|