Gavio mai ossevà che qualsiasi tenpo che fa in sta stajon ghe ze sempre mèzo popolo che no ghe va ben? Se piove no va ben parché se inpaltana la màchina pena lavà (ze un dato de fato matematico che do ore dopo el solene lavajo dela màchina piove a sece roverse), se pesta sul mojo e co se va casa le mojere tira le boche come mussi, poe spassorare i canali, poe ingorgarse le fogne co  conseguente emoragia de trina par le strade e via de longo… Se fa sole no va gnancora ben: ze arso, se brusa i racolti, se sua come carogne, bisogna tacare el rafrescamento e se spende schei, el nono sbochesa come na tenca fora dal’aqua e ris-cia de morire privando cussì la fameja de na rica pension… Par no parlare de inverno quando fa nibia, caivo, giasso, e fredo can… Alora sì chel popolo cava resie a maneta e manda a ramengo suo i vari colonbreli del aeronautica  che fa le prevision del tenpo par television. Tipo el sior Giuliani de Canale 5 che saluda sgorlando de colpo la testa e par tuta la prevision ramena in man na pena… Penso che ghe ne sia pochi in Italia che se guanta giorno par giorno el nùmaro strabochevole de strameledission che se cuca sto omo sopratuto dale mojere che lo scolta co la speransa chel anuncia sole par sugare le arte (legi “biancheria”) el dì drio e co le sente che piovarà le ghe augura el scopio del figà e le dise anca robe brute su so mama… Come se fusse colpa sua.  E lu intanto, co la so parlata da teron meriodinale,  ne conta de strurbassion e isobare che va de qua e de là de baucon a cavalo del Baltico portando scravassi e toni sul’italica penisola... Dopo, sempre soridendo come un macaco, el ne conta de pression che se alsa e sbassa fin quasi a càdare in tera, de nuclei de aria giassà che riva dai Balconi (mi co lo sento dire ste robe saro subito le finestre) o de aria umida che riva atraverso la Manica del Golfo. In sti casi mi me cavo el golfo e me mete un bel gilet sensa màneghe cussì lo frego… In realtà, secondo mi, sto omo qua spara dele robe a casaccio tanto l’Italia ze granda e larga e disendo che poe pióvare o fare seren, opure tenpestare qualche volta, magari par sbalio, el intiva. E quando che nol’l intiva el dise che le prevision gera giuste ma ze stà el tenpo che se ga sbalià… A mi el me sta antipatico forte parché el perde tenpo a contarne del tenpo che parte dala Russia o dala Siberia… Ma che me ne ciava a mi da dove chel parte el tenpo?: dime che tenpo farà sora casa mia e faea curta… Ma miga tuti la pensa cussì: me mama che pisocando sul divano scolta e varda cinquantado prevision al dì (in tute le television nassionali e locali la ze na fan incalita de Giuliaci tanto che quando che no’l intiva ghe despiase na passua… No par el tenpo ma par lu, “Poro can, che chissà quanto male chel stà!”… Mi invesse me ne frego sia del tenpo che dele prevision e co vojo savere che tenpo che fa vardo fora dala finestra e se fusse un dirigente dele television licensiaria tuti sti siensiatti ignoranti e inconpetenti e assumaria un metereologo veneto che intiva sempre… Se trata de un me amigo che se ciama Pio Vasco e che gestisse el Centro Meteorologico a Piove un Saco e che ga za creà do prevision ecessionali: infati na volta el ga dito: “Domani in Veneto gavaremo alte, basse, opure medie pressioni!” e n’altra volta el ga afermà solenemente che “Domani in Italia gavaremo tenpo variabile mentre gavaremo sicuramente pianura in Val Padana”. Pare inpossibile ma el ga indovinà parfetamente…. Desmentegavo nel so staffffss el ga un assistente italofrancese che ze specialità nel’intivare le temperature… El se ciama Gofredo Leman!!! Un nome un programa…

 Walter Basso

ORDINA SUBITO STO CAPOLAVORO



CHE TE SPIEGA LA BIBIA COME MAI NESSUN GA MAI FATO...
IN VENETO E RIVISTO DAL’AUTORE PIU’ SBOCALON DELE TRE VENESSIE


Ed. Scantabauchi srl Via Straelle di Rustega, 29
35012 Camposampiero PD - fax 049.5794781
Email: info@edizioniscantabauchi.it
cell. 335.8315665 Walter

www.edizioniscantabauchi.it